I G.B. Nyoman Pandji
Tresna ring Budaya Ngawit saking Kulawarga

Ri kala kantun nyeneng, sang sampun néwata saking Bungkulan, Buléléng puniki setata teleb nglestariang seni lan budaya Bali. Ring widang seni lan budaya Bali, I Gusti Bagus Nyoman Pandji  sujatiné senengan ring ungkur kalangané mawinan arang kramané uning ring dané. Makasujatinné mawit saking prakarsan dané, prasida makéh kagelar pidabdab pelestarian seni budaya  ring Bali.

“Yéning yakti mamanah pacang nglimbakang lan nglestariang seni lan budaya Bali sané pinih nampek dados kakawitin saking kulawarga suang-suang. Ngiring tuntun putra-putrané mangda seneng ring seni lan budaya Bali. Duaning yaning alit-alité sampun uning lan tresna ring seni lan budaya Bali, pastika seni lan budaya Baliné pacang nglimbak lan lestari,” kénten baos dané duk kantun nyeneng.

Minabang sangkaning mautsaha nglimbakang lan nglestariang seni lan budaya Bali, dané  setata ngicénin putran-putran dané ajah-ajahan indik seni lan budaya Bali.

“Tiang sakulawarga saking alit sampun kanikain lan katuntun malajahin sakancan seni lan budaya Bali,” baos silih tunggil putran dané.

Kapitresnan anak lanang sané embas tanggal 12 Januari 1925 puniki ring widang seni lan budaya, kacihnayang antuk kawéntenan dané sané saking alit sampun nyarengin sakancan sesolahan Bali. Ri sampuné anom dané sampun wikan nabuh lan masolah. Siosan ring seni tradisional, dané taler wikan lan sareng nangiang seni modéren, minakadi drama lan musik modéren. Pecak guru  SMP Bhaktiyasa Singaraja puniki  naenin nyarengin film “Sukreni Gadis Bali” lan “Jayaprana” sané kakaryanin warsa 1950-an. Dané taler sané mayasa nangiang klompok musik keroncong ring Singaraja. Sareng Pak Tjilik lan pejuang siosan dané akéh ngripta lagu-lagu perjuangan, minakadi lagu “Selamat Berjuang”, “Gunung Agung”, “Tanah Ulayatku”, “Pesanku”, “Malam Kenangan”, lan sané siosan. Ring wilangan lagu  Mars lan Hymne, silih tunggil lagu reriptan dané inggih punika  Mars lan Hymne Universitas Udayana. (ast/ita)