Dueg Ngapung

Olih W. Suardiana

 

            Kawéntenan para yowana Bali kalih yowanané ring Nusantara kadi mangkin tan bina kadi i taluh apit batu. Pinaka panyledi sané dados giing wewangunané ring Indonésia, para yowana madrebé genah sané stratégis pisan. Duaning stratégis, makéh pangrencana lan wecana sané sampun kamargiang lan kawedar saking sang Mukiang Nayaka (pemimpin rakyat). Sakémaon, makesami punika wau ring pangrencana déréng marupa pabuktian marupa laksana!

            Yowana, yén imbangang kadi entik i lalang, nedeng tajep pisan kawiadnyanannya narima sakancan ajah-ajahan sané wénten. Sampun katah kabaosang duk yowana adnyanané kari tiling, kari tajem, mawinan ring yusa nedeng anom patut akéh malajahang raga.

            Wénten kalih wicara sané mabuat pisan ngeninin indik pamargin yowanané ring panegara Indonésia. Asiki, anggan yowana sané degdeg makta pikayunan, tiling tur uleng malajahang raga kantos dados bintang kelas utawi prasida terampil. Ping kalih, wénten anggan yowana sané milu-milu tuwung, nénten madrebé uratian turmaning malajah anggén awinan, tetujoné mangda katumbasang montor anyar, HP mael, mawinan nénten trampil.

            Makasami pamargan yowana ring ajeng ri sampun anggannyané tamat malajahang angga, sané pradnyan, sané guyu-guyu, dados pikobet, duaning sang angawa rat nénten prasida nganggén para yowana sané pradnyan dados pegawé, tetep kari wénten KKN. Sané malajah guyu-guyu, polih pakaryan sané becik, samaliha sané serius nganggur. Ri tatkala masekolah taler nemuang pikobet, duaning sané tiling nénten polih uratian sané becik olih Pemerintah, sakadi juara Olimpiade, nénten kauratiang sangkaning kabaos nénten wénten prabéa, matiosan, yén sang angawa rat numbas mobil aéng polih anggaran!

            Kawéntenan yowana sané mapréstasi mangkin ngapung, sangkaning ri kala ngarereh paplajahan nénten kaprabéain olih Pamerintah, taler di sampuné tamat masekolah nénten kaicén pakaryan manut ketrampilannyané. Samaliha, yowana sané guyu-guyu, tiosan makéh sané polih pakaryan ring pamerintahan taler wénten sané belog ajum, seneng gradag-grudug nénten mragatang napi-napi, itep ngangonang montor lan ngurik HP. Nénten maritetes montor lan HP punika boya prasida kakaryanin olih wangsa Indonésiané, kémaon pakaryan wong dura negara.

            Yén asapunika kawéntenané, sampun ke i raga sareng sami, pamekas sang Mukiang Jagat (légistatif, éksekutif lan yudikatif), prasida mapikayun lan malaksana pacang asapunapiang para yowana sané dueg, lan sané belog ajum kadi punika? Napiké sampun wénten pikamkam ri tatkala sidang-sidang utawi parum ring kantor nginkinang mangda para yowanané polih genah malajah sané becik, turmaning madrebé piranti jangkep, mangda prasida makarya kapal, montor, komputer, pabrik aéng? Napi wau kantos ring studi banding manten?