SMS
Olih I Wayan Juniartha

Liang cara kidang I Wayan Ketekul Gaul ngebut-ngépot duur motor  trilné. Bungutné suir-suir, di tengah kantongné handphone baru  krényab-krényéb.

Di mukak pekené ia gruang-gruéng ngegas motorné. Disubané liu ané matolihan, I Wayan prajani  mesuang handphone-né. Sebengné tegeh, mapi-mapi ada ané nélpon.

“Yén sing kéné sinah sing ada né nawang waké ngelah handphone baru,” kéto kenehné.

Handphone aéng to. Misi kaméra, 3G, internét, tivi, radio. Mirib, séla tambus gén né sing misi. Ajiné masi aéng sajan. Satondén meliang panakné  handphone, méméné I Wayan ngubuh céléng mokoh lima. Jani masisa tuah dadua.

“Komunikasi to nak sangat penting untuk kemajuan bisnis Mé. Yén ba ngelah handphone sinah waké nyidayang ngontak pembeli nganggo e-mail, ngecék harga céléng di Singapura nganggo internét,” kéto abetné I Wayan.

Méméné percaya dogén. Panak muani tuah abesik, nyén buin lakar tohin. Tegal atugel gén ba kaadep anggo ngrédit motor tril, apabuin  céléng.

Ngancan liu ané ngrunyungin I Wayan, sayan gedé tenggekné. Patikacuh ia ngomong Inggris; oké, yés, no, sori, slegenti pesuanga.

“To mara pembeli céléng uli Singapur. Ngalih céléng 2000 anggona stok Galungan ditu,” kéto petané.

Kramané ngang-ngeb, I Wayan magruéng magedi. Kenehné liang, bayuné ajum.

Sedeng demené ngebut, mamunyi handphone-né. Ada SMS macelep, uli Sinta, céwék kafé ané kaliwat moleh kanti ngaé geleh. Sasukat I Wayan ngaba tril tur handphone baru, jeg ngancan rajin Sinta ngirim SMS mesra.

Sambilanga ngebut, I Wayan iteh magulet ajak Sinta majalaran SMS. Jrijiné I Wayan ngigel nulis “sayang”, “darling”, “I love u”, “kangen”.  Suud nulis “sayangku”, uli pengkolané nembles truk galian C.

I Wayan makesiab, narik gas tur ngépot malincer. Payu di got di mukak warung tuaké ia macemplung. Gegéson, anggota sekaa tuaké pesu. Boya ja lakar nulungin, nanging lakar mabalih. Ba makelo sajan sing ada iburan gratis.

Kijap-kijap matané I Wayan. Basangné teteh motor, bungutné tumpel handphone. Buin mamunyi handphone-né, SMS cinta uli Sinta. I Wayan sing nyidayang ngwales, jrijiné ba telah lih.

“Né ba adané SMS (Sengap Matemu Sengsara). Truna-truna-né jani jeg mula demen sajan gegéson. Sing bisa polos negakin motor. Jeg pang misi sambilang nélpon, sambilang SMS,” kéto I Pekak Pocol Ongol Ongol.

“To ba adané kemajuan téknologi Kak. Makejang harus énggal, pang sing kélangan selah, pang sing kalahin galah,” masaut I Kadék Informasi Basa Basi sambilanga ngaba kursi ka sisi.

Jani negak ia di kursiné, mabalih anaké ané ngrunyungin I Wayan. Konyangan ngorta, konyangan ngemang saran, kéwala sing ada ané tuun nulungin I Wayan.

“Jani pedanda gén ba ngaba handphone, ba mabekel laptop. Yén kanti ketinggalan téknologi, sinah lakar ketinggalan rejeki masi,” kéto abetné.

Kaliwat percayané kén téknologi, kanti papat I Kadék ngubuh handphone. Kaliwat nyeh kélangan rejeki, kija-kija ia terus mabekel handphone.

“Sambilang meju jani nyidayang ngortaang bisnis. Yén sing ada handphone sinah sing nyidayang cara kéto,” kéto ia ipidan mapeta.

To satondén ia kapongor di Pura Dalem. Kramané sibuk mabakti, handphone-né I Kadék jeg terus krang-kring. Ada ané uli rekan bisnis, ada uli teman selingkuh. Pamuputné, jeg korslét handphone-né tetelu. Ané besik terus mamunyi. Mara jemaka kén I Kadék; ternyata ané nélpon tuah Ida Betara Prajapati.

“Yén terus ci krang-kring, jeg asli lakar blokir nira atman ci-né,” kéto koné pangandikan Ida Betara.

Suud I Kadék ngubuh handphone papat. Suud matélpon-télponan duk meju. Sing bani ma-SMS-an di pura. Handphone ané abesik kaputa ban kain poléng tur bantenina sabilang kajeng kliwon. Handphone tenget duén Ida Betara Prajapati. Nanging, nu kukuh ia percaya kén téknologi.

Bangun ia uli kursiné. Tuun ia ka goté. Boya ja I Wayan ané tulungina, boya ya motor trilné ané angkida, nanging handphone baruné I Wayan ané jemaka. Sambilanga makenyem, I Kadék nulis tur ngirim SMS abesik.

“Melah sajan ada handphone, ada kemajuan téknologi, dadiné nyidayang nga-SMS Sinta unduk I Wayan kena kecelakaan. Apang sing Sinta nyap-nyap krana SMS-né sing bales-balesa kén I Wayan,” kéto abetné.

Mamunyi buin handphone-né I Wayan. Ada SMS baru macelep; Sinta ngajakin I Kadék makenalan. Kijap-kijap matané I Wayan.