Dueg mueg

            Kalebihan numadi dadi manusa prasida minayang sané kén kasengguh becik kalawan tan becik, tur prasida ngétakang naya upaya ngruakang pikobet lan kabrebehané. Taler prasida ngrasayang sané kén metuang liang lan sané kén metuang pikobet .Pikayun lan wirasa nyikiang paplajahan palanturan uripé puniki sakadi babuat numadiné.

Yan kaétang-étang tuekang pisan niki kalewihan i ragané numadi dados manusa wiakti utama pisan duaning prasida nulungin i raga saking kasengsaran malarapan antuk malaksana sané becik. Titi malaksana sané becik punika wantah malajah, nelebang sakancan tata cara kadharman, mangda uning napi sané patut kalaksanayang. Yan sampun uning sakancan tata paplajahan nika anggén nyuluhin angga mangda prasida malaksana sané becik. Apang nénten sangkaning ten uning (awidya) mamuuk malaksana wantah ngélingang kamelahan déwék. Ririhé mangda mawiguna ngawé suka wong lén. Dueg nanging mueg kerana duegé tan nganutin dharma. Metuang karirihan wikan nanging metuang wirasa pangarga astiti ring sameton lan gumi nénten prasida. Sangkaning duegé lantas nuegin anak lén ané ngranayang sengsara sametoné. Sakadi tutur Brahmana Kusika sané sampun wikan, sakti, setata nyurya sewana nanging tan prasida nyanggelang krodannyané ri tatkala wénten jadma wiadin sato sané kasengguh malaksana tan becik. Ri tatkala Brahmana Kusika ngawacén wéda ring batan taruné sané ageng jeg wénten paksi mabacin ngenénin prabunidané. Duka tan kaparan-paran Sang Brahmana Kusika raris metuang kasaktiannyané mawinan padem paksi punika. Metuang karirihan wikan nanging metuang kadharman tan prasida. Sangkaning ririh sangkaning kuasannyané raris mademang paksi punika. Karirihané mueg. Malajah kantos dueg nanging ri sampuné ngluer karirihané tur sampun polih linggih sané becik  duegé tan ja kaanggé ngukuhing dharma nanging malaksana adharma.

            Yén sampun prasida nelebang sakancan tata paplajahan karirihan raris polih genah, dados manggalaning jagat, jeg sampun menggah ri kayun mangda sinamian bakti ring i raga, mangda ngayah ring i raga kerana i raga dueg. Duegé mancarang kasaktian. Sakadi taler caritan Brahmana Kusika, kerana ida brahmacari wantah setata ngarepang boga saking anak tiosan. Raris nunas boga ring anak istri sané kantun rejek makarya. Tan kasanggra becik napi malih sarauh rabin sang stri wawu sané rauh saking makarya dahat lopyo kasanggra kaaturin toya. Duka sang Brahmana Kusika duaning ida uning sang istri patut nyanggra suami. Sangkaning sang brahmana tan karunguang, raris kadropon maosang anak istri punika sombong. Sang stri nyawis sampunang sangkan ririh gelis mastu anak tiosan, élingang taler kapatutan parilaksanan sang brahmana sané ngajegang dharma patut kasobiahang ring panjaké. Sampunang mapikayun mangda kabaktinin lan kaaturin kémawon napi malih nyiksa lan mademang jadma lacur cara I kedisé wawu. Dueg sajaan ratu nanging mueg cahyan ratuné ten sakadi Dharmawyadha ring Kuta Negara.

            Kasemprot dueg mueg mapangsegan sang Brahmana Kusika lan nyrucut ka Kuta Negara ngrereh I Dharmawyadha. Tan asuwé raris kapanggih I Dharmawyadha sané maadolan daging ring pasaré. Kenyung manis alep nyanggra para sametoné sané matumbasan lan sasampuné usan maadolan raris budal ngayahin yayah renannyané, lan keluargannyané. Tan wénten mabinan-binan, nglaksayang karya, subakti lan ngawé suka wong lén. Sangkaning karirihané ipuné raris kajudi ngétang keluargannyané mangda prasida bagia kapanggih lan ngayahin anak tiosan majalaran patut laksana sujati.

            Deriki wau sang brahmana makleteg ring kayun yadiastun ririh, ngaluer sampun malajahin kadiatmikan lan sakancan kasaktian. Nanging, yan laksanané tan kadandan antuk dharma lan kajujuran tan bina mueg cahya kaduegané. Kalewihan lan tetanjek ririhé patut dasarin antuk laksana sané ngajegang dharma ngayomin lan ngawerdiang karahajengan jagaté, Karirihané sané kapolihang saking sakancan paplajahan patut anggé nyuluhin kapetengan pamargin guminé mangda laksanané nénten sangkaning tan wruh ring dharma.