Ni Madé Dwi Ary Puspita
Waged Maulatan, Meled dados Pangusaha

Alit-alité mangkin minab akéh nénten seneng lan kayun malih malajahin ketrampilan maulat-ulatan. Nanging nénten sapunika ring Ni Madé Dwi Ary Puspita sané ketah kajeritin Ary. Siswa kelas VI A SDN 1 Peguyangan, Dénpasar puniki, teleb pisan malajah maulat-ulatan, wastu prasida molihin prestasi. Ary dados juara pertama lomba nganyam tingkat SD se-Kecamatan Dénpasar Utara. Saking piolihan punika, putri nomer kalih saking tigang  panyamaan  anak alit Drs. I Nyoman Sunarya sareng Dra. Luh Sriani puniki,  kajudi ngwakilin Dénpasar Utara nyinahang kawagedan maulat-ulatan ka tingkat Kota Dénpasar. Yadiastun duk punika wantah polih juara kalih, Ary ngangken nénten kuciwa. Salian pamiletnyané akéh, Ary ngangkenin durung sué malajah maulat-ulatan.

“Tiang mula demen plajahan ketrampilan. Napi malih  pelajaran menganyam. Yéning rerainan, tiang sering nulungin ibu ngulat ketipat,” baos Ary saha kenyem.

Kawagedan Ary maulat-ulatan wantah sangkaning bimbingan gurunnyané, Ida Ayu Kadé Patni Kartini. Pangawitnyané wantah makarya anyaman biasa, raris kalanturang makarya anyaman marupa tas santé saking daun ental. Asilnyané kaangkenin becik.

Yadiastun sadurung malomba ring tingkat Kota Dénpasar latihan wantah tigang rahina, nénten ngawi anak alit puniki ragu-ragu nyarengin lomba, Ary percaya ring ragané.

“Informasi lombané nénten pas, ri kala lomba wénten sané ngandikayang  waktu muputang wantah  ajam, tiang makarya tas cenik. Tiang salah informasi. Waktu sané kasediang  tigang jam. Yéning uning waktuné tigang jam, tiang makarya tas sané ukurané agengan,” tutur Ary kimud.

Pikolihnyané ring undagan kalih punika, ngawinang Ary molihang adiah marupa jinah, piala, lan piagam. Ary ngangken jagi terus malajah lan malatih ngayam mangda prasida nagingin citan-citannyané dados pangutsaha barang-barang kerajinan khas Bali. (nik)