Dot Mati

Olih I Wayan Juniartha

 

Ada ané lebih sukeh idupné kén i  legu?

 

Yén bangun kaliwat semeng, asli lakar mati uyak andus fogging Dinas Keséhatan. Yén bangun kaliwat tengai, asli lakar sing man lud. Umah-umah ba pada puyung. Manusané ba konyangan gegéson ka kantor. Time is money, koné.

 

Yén ngandelang peteng dogén anggo ngalih amah, sinah lakar ngemasin mati masi. Monto liuné ada jenis ubad legu jani, uli ané miik kanti ané pengit, jeg asli kéweh sajan ngalih pangupa jiwa.

 

“Di ageté man nyegut jelema abesik, ané bakatanga anggota DPRD. Da san ngemang getih, nguliang pis tunjangan gén ba sing nyak. Asli asan getihné pait makilit. Telung dina ba i legu lakar ngutah mising,” I Wayan Gumatat Gumitit nuturang.

 

To mara urusan ngalih pangupa jiwa, tondén urusan membina keluarga sejahtera. Da san lakar ngelah panak sarjana, nyidayang ngelah panak gén ba untung i legu.

 

“Mara marupa taluh gén ba liu ané mati. Yén sing caplok bé, taluhé uruga kén i manusa. Makelo-kelo sinah lakar sing ngelah pretisentana i legu, yén ia mati lakar sing nyidayang dadi Betara Hyang Guru, sing man suarga,” kéto abetné I Wayan.

 

Yén ba kena tuak, I Wayan nak mula ngendah satuané. Mara sajan sekaa tuakné serius mligbagang nyén ané cocok dadi gubernur Bali,  I Wayan jeg élah nyatuang legu.

 

“Amonto kéwehné idupné i legu nanging kanti jani tondén taén cang ningeh legu bunuh diri.”

 

Prajani sepi patuakané. Konyangan mendep. Mara ipuan anggota senior sekaa tuaké, I Putu Mabuk Lagi, ngantung iba. Kaliwat punyahné, pelih baana negul tali. Buung I Putu mati, kupingné dogén ané payu magantung.  Kanti jani, kupingné nu di carang punyan kopiné. Sing ada ané nyak nulungin kuping.

 

“Liunan ané bunuh diri to krana dot ngalih perhatian, krana marasa sing ada ané ngrunguang,” I Madé Psikiatri Méditasi Anti Déprési  masaut.

 

I Madé demen sajan méditasi, jemet mlajahin psikiatri nanging nu dogén kena déprési. To kranané nu dogén ia nelik di dagang tuaké.

 

Yén seken krana dot ngalih  perhatian, nguda liunan anaké bunuh diri di tongos ané sepi, ané sing liu ada jelema. Yén sing di tengah kamar, liunan ané ngantung iba di tegalan. Yén sing kéto, di sisin tukadé ané serbi ba ia nguluh portas.

 

“Lénan kén tonya, nyén ané lakar ngemang perhatian di tongos-tongos kéto?” Nyoman Ngamah Sing Taén Mayah matakon.

 

Yén seken krana dot ngalih perhatian, patutné ngantung iba di tengah peken, nginem portas di balé banjar. Yén seken dot sajan-sajan ngalih perhatian, dadi masi bunuh diri di natar pura.

 

“Asli lakar liu sajan man perhatian. Apabuin yén di pura. Yén ba kanti ngaé désané nelahang pis anggo guru piduka, bendu piduka, macaru gedé di pura, asli kanti atiban nu lakar ingetanga kén kramané,” kéto raosné sambilanga bungker-bungker.

 

“Jaman cara jani, nyén ané sing dot ngamatiang iba, nyén ané sing dot mati?” I Madé Kerakap Tumbuh Di Batu nyelag.

 

Gelas tuakné puyung, matané uli tuni ba puyung-mangmung.

 

“Jaman cara jani, tuah ané corah ané nyidayang idup. Yén sing nyogok lakar sing man gaé. Yén sing korupsi, gaéné asli lakar sing nekaang apa. Yén sing kolusi pasti lakar masuk bui krana korupsi.”

 

“Jaman cara jani, jelema ané melah ané lakar sing ngelah gaé, lakar lacur, tur yén jelék sajan nasibné, lakar masuk bui,” kéto abetné.

 

Ongkeb sajan warung tuaké, konyangan ngelésang baju, konyangan matané puyung.

 

“Yén jelema corah ba kapercaya  dadi pemimpin, koruptor kasembah dadi tokoh masyarakat, penipu kasungsung dadi pemimpin umat, nyén sujatiné ané nu nyak idup?” kéto patakoné I Madé.

 

“Nak liu masi ané  ngamatiang iba krana ba sing percaya kén idup. Yén ba sing ada ané lakar patut tindihin, yén ba sing nyidayang nindihin ané patut, sing mula luungan mati?”

 

Sambilanga ngenyit roko, I Madé magedi. Konyangan mendep. Leguné ngrunyung, sing ada ané ngender-ngaplakin. Konyangan madalem i legu. Konyangan madalem I Madé.

 

Sujatiné, ada ané lebih sukeh idupné kén i legu. Ané lebih sukeh idupné kén i legu sing ada lénan kén jelema melah di jaman corah.